羅拔佬150戰受傷　波蘭1場熱身賽損失3位猛將

周二(11日)凌晨國際熱身賽，波蘭以2比1擊敗土耳其，但付出沉重代價，為國家隊第150次披甲嘅射手羅拔利雲度夫斯基不幸受傷，未知能否上陣踢歐國盃首輪分組賽對勁旅荷蘭。

開波之前，羅拔利雲度夫斯基獲頒150號球衣，紀念佢為波蘭第150場上陣，同時累積入82球，兩項數字都係波蘭史上第一。呢位35歲老將不負所望，開波12分鐘就貢獻助攻，傳畀中場施域達斯基射入打開紀錄。換邊之後，土耳其靠巴尼斯爾馬斯入波扳平，戰至補時波蘭由薩利域斯基攻入致勝1球，險勝2比1，取得熱身賽2連勝。

不過，波蘭領隊普比斯笑唔出，因為今場損失3位猛將，入波功臣施域達斯基踢咗19分鐘，因為扭傷足踝離場，估計需要休息3至5日。最大鑊係戰至33分鐘，羅拔利雲度夫斯基大腿受傷，退下火線，未知能否趕及周日(16日)晚首場歐國盃對荷蘭。另外，中堅達維杜域斯踢完上半場後，因為肌肉受傷，無法繼續比賽，下場歐國盃亦上陣成疑。

波蘭位處歐國盃D組，對手包括荷蘭、奧地利。法國。