4位意大利國腳忙轉會　迪羅倫素同意加盟祖記

歐國盃將於周六(15日)凌晨揭幕，上屆冠軍意大利除咗積極備戰之外，多位球員亦忙於處理轉會事務，根據《Football Italia》爆料，拿玻里右後衞迪羅倫素已經同祖雲達斯達成協議，將於今夏加盟呢支意甲季軍。

迪羅倫素有份協助意大利捧上屆歐國盃冠軍，亦係拿玻里贏得2022/23年球季意甲冠軍嘅主力，但呢位30歲右閘不滿會長迪羅倫迪斯嘅管理手法，早已打算今夏離隊，祖雲達斯迅速出手斟介，雙方已達成個人待遇條款，依家等兩間球會展開轉會費談判。

祖記雖然即將簽入迪羅倫素，但面臨失去另1位意大利國腳費達歷高基艾沙，呢位26歲翼鋒只剩下1年合約，並拒絕續約，盛傳羅馬、拿玻里計劃收購佢。

另外，兩位意大利新晉中堅布安基奧奴、卡拉科利亦準備今夏轉會，效力拖連奴嘅布安基奧奴獲得車路士及拿玻里垂青，至於博洛尼亞中堅卡拉科利可能同教練莫達一齊過檔祖雲達斯。