意大利3位中場缺席操練　史巴列堤頭痕

意大利衞冕歐國盃前景出現暗湧，根據《Football Italia》報道，3位中場大衞法迪斯、尼高路巴列拿、法基奧利因為有傷在身，缺席球隊團體操練，未知能否出戰周日(16日)凌晨B組首戰對阿爾巴尼亞。

意大利上屆歐國盃奪冠主力尼高路巴列拿近期受肌肉傷患困擾，已經缺陣早前2場熱身賽對土耳其及波斯尼亞，球隊抵達今屆歐國盃主辦國德國之後，尼高路巴列拿仍然未能參加團體操練，只能自己進行訓練。

至於法基奧利、大衞法迪斯上場熱身賽對波斯尼亞，都擔任正選，效力祖雲達斯嘅法基奧利喺比賽中整傷肌肉，只能留喺健身室訓練。至於上仗射入1球嘅大衞法迪斯同樣有輕傷在身，領隊史巴列堤為安全起見，唔需要佢參加操練，相信呢位國際米蘭中場應該可以上陣對阿爾巴尼亞。