遊玩迪士尼收荷蘭急Call　舒克斯直飛德國

歐國盃展開前陸續有球員受傷，荷蘭周四(13日)緊急徵召前鋒約舒亞舒克斯，呢位23歲前鋒本來喺美國嘅迪士尼樂園渡假，收到朗奴高文急Call後即刻啟程去德國，連轉會AC米蘭嘅斟介亦可能受到拖延。

由於古普美拿斯受傷退隊，前鋒波貝比亦有傷在上，朗奴高文決定補選博洛尼亞前鋒約舒亞舒克斯，根據呢位前鋒嘅社交網動態，佢近日喺美國暢遊各大樂園，收到徵召後佢再更新社交網，擺出勝利手勢留言：「當你由迪士尼飛去歐國盃......」

約舒亞舒克斯上季意甲入11球，表現出色獲多間豪門垂青，AC米蘭已啟動佢合約內4,000萬歐元買斷條款，但因經理人索取高額佣金而拖住，本來雙方繼續談判，但依家約舒亞舒克斯要去踢歐國盃，轉會隨時再度拖延，有消息指曼聯同阿仙奴都準備加入戰團，呢位前鋒如果喺歐國盃有好表演，隨時有更多豪門加入爭奪。