歐國盃集圖冊勁搞鬼　英格蘭有呢個人

每次世界盃或歐國盃大賽，玩集圖冊係唔少老一輩球迷嘅「傳統活動」。自1970年開始，官方集圖冊一直由Panini包辦，不過今屆歐國盃就改由美國嘅Topps負責，結果因為版權問題而鬧出笑話。

Topps拎到官方集圖冊出版權，不過Panini仍然擁有部份英格蘭、德國、法國、意大利球星嘅肖像權，好似英格蘭2大主力菲爾科頓同史東斯，就唔可以喺Topps嘅集圖冊出現，結果Topps為咗「填數」，英格蘭嘅貼圖竟然加入李斯特城後衞勞基湯馬士，呢位22歲球員從未入選過英格蘭大國腳，有份出現喺歐國盃集圖冊都幾搞鬼。

Topps今屆請嚟摩連奴做集圖冊代言人，不過唔少球迷批評歐洲足協、Topps同Panini玩嘢，破壞晒一班集圖冊愛好者嘅收集體驗。菲爾科頓曾公開自己係足球集圖冊收藏家，可惜今屆佢擔大旗出戰歐國盃，集圖冊竟然冇佢份，認真慘情。