拜仁打造亞洲防線　3000萬歐元簽伊藤洋輝

拜仁慕尼黑新帥高柏尼上任後，全力重建球隊防線，佢哋周三(12日)啟動史特加中堅伊藤洋輝合約內3,000萬歐元買斷條款，呢位日本國腳將去慕尼黑做體測，有望同南韓中堅金玟哉組成亞洲防線。

德國《圖片報》報道，拜仁慕尼黑同熱刺都願意收購伊藤洋輝，不過呢位25歲守將就屬意留喺德國，因為佢冇幾耐之前先至榮升爸爸，希望家人可以喺德國安頓，而慕尼黑同斯圖加特只係2個鐘頭車程。

伊藤洋輝上季德甲上陣26場，當中有25次係正選，而且可踢中堅同左閘，係史特加拎到聯賽亞軍嘅重要成員。拜仁簽入伊藤洋輝後仲未收手，據報依家仍斟介利華古遜嘅德國國腳後防莊拿芬泰希。