帶埋暑期功課去德國　耶馬將破歐國盃紀錄

當唔少學生哥趁住放暑假四圍去玩，16歲嘅西班牙球星拉明耶馬就要為國爭光，爭取將歐國盃冠軍帶返西班牙。呢位巴塞隆拿新星好唔得閒，今次決賽周仲要帶埋暑期功課去德國，而且又要視像上堂，堪稱係模範學生。

只得16歲嘅拉明耶馬火速上位，更成為西班牙爭冠希望，佢亦自知身負重任，日前接受《阿斯報》訪問嗰陣表示：「以前我同阿媽瞓喺梳化睇歐國盃，今次我嚟德國唔係觀光，而係要嚟創造歷史，希望西班牙可以走到最遠。」

如果拉明耶馬喺今屆上陣，將會打破波蘭球員高斯洛斯基上屆創下嘅歐國盃最年輕上陣紀錄(17歲246日)，不過耶馬同時需要兼顧學業：「我帶埋功課嚟做，因為我已經係高中最後1年，而且仲有視像堂要上，我覺得自己做得唔錯，希望老師唔好『肥』我。」

西班牙隊長艾華路莫拉達，亦表示睇好耶馬會成為頂級球星：「可以同耶馬踢波係榮幸，佢嘅貢獻與別不同，如果佢幸運冇嚴重受傷，肯定會成為世界最頂尖球員行列，因為就算依家只得16歲，佢已經比其他球員行前幾步。」