白禮頓領隊愈搵愈後生　新帥只得31歲

白禮頓同迪薩比解約後，近日搵到新帥接手，佢就係剛協助德乙聖保利重返德甲嘅美籍31歲少帥靴斯拿，據報雙方已達成協議，簽約至2027年。

德國傳媒報道，白禮頓同聖保利過去一周進行談判，近日雙方就賠償金事項出現積極進展，預料將可達成全面協議，靴斯拿正式過檔白禮頓執教。

白禮頓已準備同靴斯拿簽署一份3年合約，年期至2027年，如果成事，靴斯拿將成為英超史上最年輕領隊。

靴斯拿在美國出世，2歲隨父母到德國定居，在德國展開職業生涯，少年時在拜仁慕尼黑青訓營學法，踢過拜仁2隊及多支低組別球隊，並在業餘隊兼任教練，2020年擔任聖保利助教，2022年坐正成為主帥，當時佢只有29歲，用咗兩季時間，上季帶領聖保利奪得德乙冠軍，來季升上德甲。