【有片】歐國盃神獸出動！德國險勝蘇格蘭？

歐國盃星期六(15日)凌晨展開，德國將以東道主身份爭冠。14年前南非世界盃，德國奧伯豪森水族館出現「足球神算」八爪魚保羅，以100%準確率成功預測德國隊7場賽事，喺全球掀起熱潮；今屆歐國盃亦有「神獸」出動，地位崇高嘅多蒙特「猩猩預言家」禾達，就預測德國會喺揭幕戰險勝蘇格蘭。

八爪魚保羅嘅傳奇故事無「人」能及，不過今次預測歐國盃嘅禾達亦地位崇高，已經35歲嘅禾達早喺2013年已經預測足球賽果，包括歐國盃、世界盃以及牽涉「主隊」多蒙特同德國嘅比賽，雖然佢嘅預測「勝率」唔算特別高，但以佢十幾年嘅貼波經驗，每次預測都會引起關注。

禾達預測德國贏波：https://twitter.com/i/status/1801244912504954956　

多蒙特動物園員工今次喺兩個桶內，分別放入德國同蘇格蘭嘅頸巾，結果禾達猶豫咗一陣，就伸手去拎德國隊個桶。動物園發言人馬素解畫：「禾達喺兩個桶前面停低，望兩望就直接去拎德國個桶，個預測係德國會贏，但禾達之後再走去蘇格蘭個桶，所以蘇格蘭都唔差太多，德國會險勝。」