法國隊多人染流感　麥巴比缺席操練

法國爆發流感疫情！周四(13日)法國隊喺帕德博恩進行公開操練，4,000張入場波飛喺幾分鐘內被掃晒，不過主力球星基利安麥巴比就缺席練習，留喺健身室進行單獨訓練。據報法國陣營近日爆出流感，京士利高文同領隊迪甘斯等多人中招，不過病情唔算嚴重。

今次公開操練入面，基利安麥巴比同京士利高文都冇露面，據法國媒體《RMC》報道，京士利高文成為最新1個感染流感嘅成員，過去1個星期已有迪甘斯、奧士文尼迪比利同多名職、球員出現感染徵狀。

效力巴黎聖日耳門嘅奧士文尼迪比利，承認自己係「源頭」所在：「上星期我患流感，係第1個中招嘅人，不過依家已經好番晒咁滯，全隊都好番好多，過多兩日就會OK。」

報道指基利安麥巴比並冇染病，安排單獨健身只係要控制佢嘅身體情況。法國下周二(18日)凌晨會對奧地利，展開D組首場賽事。