劉舜文：慕尼黑的蘇格蘭力量

各位東網嘅朋友，大家好！好高興今次可以隨Now TV嘅採訪團隊，飛抵德國直擊今屆歐國盃！我哋經過16小時嘅機程，周三上午終於到達今晚揭幕戰城巿慕尼黑，第一站就直奔慕尼黑地標「瑪麗安廣場」。

勢估唔到，我哋一到達，大量蘇格蘭粉絲都喺露天餐廳喝酒。當佢哋見到我著住德國波衫，就立即走過嚟包圍我，然後就……友善咁拍住我肩膊放聲高歌，成件事就係不折不扣嘅「反客為主」，當中亦帶點幽默。

麥甘尼最受球迷歡迎

晚飯我們就喺皇家啤酒屋狂食馳名國際嘅鹹豬手，啤酒屋入面著住波衫嘅球迷，九成都係捧蘇格蘭！問佢哋最喜愛嘅蘇格蘭球星係邊位，最高票數嘅並非麥湯文尼或安德魯羅拔臣，而係阿士東維拉嘅約翰麥甘尼，唔知大家有冇感到意外？至於今屆揭幕戰又會唔會出現意外賽果？

雖然德國近兩場熱身賽表現唔算突出，但係兩大新星科利安華迪斯及穆斯亞拿嘅火花及靈巧打法，應該足以撕破蘇格蘭靈活性不足嘅防線。蘇格蘭雖然曾喺外圍賽擊敗西班牙，但之後已經再無佳作，友賽英格蘭、法國、荷蘭等名牌全部大敗。總括而言，我更有信心德國揭幕戰可以大勝而回！