睇C朗練波　黃牛飛炒到6,800蚊

C朗離開歐洲已經年半，除咗幫葡萄牙外圍賽同熱身賽，基本上都留喺沙特，今次因為歐國盃，C朗重臨歐洲自然哄動，除咗睇葡萄牙比賽，連睇佢練波都好搶手，據報C朗喺德國公開練習門票，黃牛飛炒到800歐元(約6,800港元)。

葡萄牙國家隊將會在德國威斯特伐利亞基地進行操練，周五(14日)一課公開練習，葡萄牙足總對外發放6,000張免費門票，開派幾分鐘內已經被搶晒，其後有人將練習門票在網上出售，票價最低要400歐元，部分票價為800歐元。

C朗在上場熱身賽復出即為葡萄牙攻入2球，以3比0大炒愛爾蘭，國家隊史上最多入球紀錄增加到130球，為歐國盃壯行色。葡萄牙編入F組，首場賽事將於周三凌晨對捷克。