扭波狂人穆斯亞拿獲全場最佳　拿高斯文激讚

德國喺歐國盃揭幕戰進攻水銀瀉地，21歲嘅穆斯亞拿首次出戰歐國盃全無怯場，全場有5次成功扭波過人，而且仲有1個入波進帳，賽後獲歐洲足協選為今場最佳球員，亦被領隊拿高斯文大讚。

穆斯亞拿今場侵略性極強，每次拎波都係「跳舞式」向蘇格蘭守將發起挑戰，全場8次嘗試過人有5次成功扭過，兩項數字都係全場最高，被評為今仗最佳球員。穆斯亞拿賽後表示：「輕鬆大勝係好現象，球隊進攻好多元化，令我踢得好享受，希望之後會繼續進步。」

德國領隊拿高斯文亦確定佢進攻核心位置：「我唔需要提穆斯亞拿要點做，佢會自己解決問題，佢今場表現無與倫比，影響力非常巨大。穆斯亞拿喺世界盃嗰陣錯失好多機會，但依家佢唔單止入波，仲踢得一場非常出色嘅賽事。」