逆齡將帥　拿高斯文同紐亞合力創紀錄

德國喺歐國盃揭幕戰以5比1擊敗蘇格蘭，並創造一項另類紀錄，德國主帥拿高斯文只係36歲，正選門將紐亞已經38歲，令賽事史上首次出現領隊派出比自己年齡大嘅球員擔任正選。

與此同時，拿高斯文亦以36歲零327日成為歐國盃決賽周史上最年輕領軍比賽嘅領隊，不過德國今場正選陣容平均年齡達28.7歲，成為球隊自2000年歐國盃對羅馬尼亞以來，踢國際大賽(世界盃及歐國盃)最大平均年齡正選陣容。

紐亞有份拉高德國球員平均年齡，佢至今喺世界盃及歐國盃，合共上陣35場，超越拿姆，成為國際大賽史上上陣次數第3多嘅歐洲球員，僅次於C朗(43場)同馬甸尼(36場)。此外，紐亞喺歐國盃上陣16場，僅次於17場嘅保方，打破紀錄指日可待。