塞爾維亞長人鋒線　高空轟炸英軍防線

英格蘭對塞爾維亞嘅分組賽，賽前普遍睇好英格蘭贏波，不過塞爾維亞亦有一招殺着值得留意，佢哋係今屆平均最高球隊，有阿歷山大米祖域、杜辛華荷域同米連高域沙域等「空中霸王」，必定會向英格蘭進行高空轟炸。

據《The Athletic》報道，史杜高域帶領嘅塞爾維亞最擅長兩翼傳中，利用1米90嘅杜辛華荷域同1米89嘅阿歷山大米祖域身高優勢，佢哋近10場比賽嘅15個入波，當中有10球來自傳中，另有4球來自死球，對住冇咗哈利馬加古尼嘅英格蘭防線，隨時有機會偷雞。

英格蘭前鋒哈利卡尼亦提醒隊友：「如果防守設計出錯，塞爾維亞有能力懲罰你，佢哋有好多好高嘅球員，非常危險，唔小心嘅話就會陷入苦戰。」塞爾維亞領隊史杜高域就話：「我哋研究清楚英格蘭，亦知道自己嘅優勢，我哋好滿意自己嘅踢法。」