前阿仙奴箭頭奇雲甘保急病離世　享年54歲

前阿仙奴箭頭奇雲甘保於周六（15日）因急病突然離世，享年54歲，阿仙奴及一眾前隊友都喺社交媒體都發文或發相悼念。

今個月頭奇雲甘保曾效力過嘅愛華頓發出消息，指佢因急病入院，而且非常不適，入院近兩周後，周六與世長辭，令人意外。阿仙奴在官網發文，突然收到奇雲甘保離世消息，感到非常震驚，並指呢位前鋒喺阿仙奴受到眾人愛戴，原佢安息，前阿仙奴隊友伊恩胡禮同阿當斯，都在社交媒體分享佢哋與奇雲甘保昔日舊照，以作悼念。

出生於1970年嘅奇雲甘保，15歲就加入阿仙奴青訓，一直效力至1995年，打過213場入咗59球，唔單止1991年全季僅1敗下奪得英格蘭甲組聯賽冠軍（當時英超未成立），亦奪過英聯盃、英足盃及歐洲盃賽冠軍盃等，之後效力過愛華頓、諾定咸森林、西布朗、卡迪夫城等球隊，掛靴後曾擔任評述員工作。