施斯高續約　一種情況明年可入「廠」

斯洛文尼亞前鋒班捷文施斯高被譽為「新夏蘭特」，獲得阿仙奴、曼聯、車路士等大球會垂青，一度被指有望下季登陸英超。不過，呢位21歲射手近日決定同RB萊比錫續約至2029年夏天，想先磨練好自己，再接受新挑戰。

班捷文施斯高同艾寧夏蘭特一樣喺薩爾斯堡嶄露頭角後，轉戰德甲，佢上年夏天加盟RB萊比錫，雙方簽約至2028年。施斯高剛過去一季為RB萊比錫各項賽事上陣42場入18球，並協助斯洛文尼亞打入今屆歐國盃決賽周。

雖然施斯高入球率唔及夏蘭特，但勝在年輕，仍有大把潛力，所以吸引多間大球會注意。當中以阿仙奴最有興趣簽入班捷文施斯高，準備以5,500萬鎊(約5.4億港元)收購佢，但呢位身高1米95嘅「長人」最終決定續約多1年，直至2029年6月。

不過，班捷文施斯高合約之中有「君子條款」，佢有權要求2025年或26年轉會，阿仙奴等各大豪門想獲得呢位猛將加盟，其實只需要等多1年。