皇馬歐聯神鋒只值呢個價　買嚟擺都抵

皇馬今夏簽入基利安麥巴比同巴西天才恩迪克，加埋現有嘅巴西孖寶雲尼斯奧斯祖利亞同洛迪高高斯，前鋒線夠晒人，今季由愛斯賓奴外借回巢嘅祖斯盧辛馬田去留引起討論，據報呢位34歲西班牙國腳買斷費只需150萬歐元1,270萬港元)，皇馬未有決定。

西班牙傳媒報道，皇馬今季借用祖斯盧，原本只係戥腳，用嚟填補賓施馬離隊嘅中鋒空缺，但佢踢踢吓又表現唔錯，結果全季上陣49場，攻入17球及3次助攻，最有價值入球，當然係歐聯4強次回合反勝拜仁嗰兩球。

報道指，如果祖斯盧願意，就可以留隊，繼續為皇馬效力，而皇馬買斷佢嘅費用只要150萬歐元。

雖然祖斯盧去留未落實，但佢有份入選今屆歐國盃西班牙大軍，仲着住9號波衫，分分鐘喺今屆賽事省幾粒都唔出奇。