23秒閃電失波　意大利淡定反勝阿爾巴尼亞

衞冕歐國盃嘅意大利，周日(16日)凌晨喺B組第1擊有驚無險，雖然23秒就閃電失波，但意大利畢竟實力更高，三扒兩撥就反敗為勝，最終贏2比1打響勝鼓。

今場比賽早段即高潮迭起，阿爾巴尼亞開波23秒就製造驚喜，意大利左閘費達歷高迪馬高掟界外球送禮，掟入自己禁區被尼迪美巴拉美搶到，呢位效力薩斯索羅嘅中場窄角度狂抽網頂領先，而23秒入波亦創造歷史，成為歐國盃史上最快出現嘅入波。

意大利失守後極速重組，不斷用短傳製造機會，11分鐘用短角球戰術，中堅巴斯東尼接應羅倫素柏歷堅尼傳中頂入；5分鐘後意大利反超前，尼高路巴列拿禁區頂窩利抽。意大利之後控制戰局，大衞法迪斯曾近射中柱，施卡馬卡同羅倫素柏歷堅尼連番攻門亦無功而還。

下半場意大利將防線收後，不過阿爾巴尼亞攻擊力有限，埋門欠奉，令形勢變得膠着。意大利零星攻勢比較有威脅，60分鐘費達歷高基艾沙熨射斜出，阿爾巴尼亞補時曾有黃金機會，但曼拿祖近射掠門而過，最終意大利順利保持2比1勝果。