意大利4人傳球過100次　史巴列堤反而唔滿意

意大利喺歐國盃B組首戰有驚無險贏波，佢哋全場控制戰局，更有4名球員錄得超過100次傳球，係歐國盃史上第2支做到嘅球員。不過領隊史巴列堤就好唔滿意，批評球員「齋傳」冇意義，要求球員要踢得更加進取。

意大利開波23秒就失守，不過踢到16分鐘已經反勝，之後完全控制晒戰局，點知去到下半場大踢悶波，喺中場不斷傳球睇到球迷恰眼瞓，最終有4名球員傳球超過100次，包括佐真奴費路(120次)、迪羅倫素(114次)、巴斯東尼(110次)同尼高路巴列拿(105次)，係上屆西班牙(分組賽對瑞典)之後，歐國盃史上第2隊有4人單場傳球過百。

數據還數據，事實係意大利喺補時幾乎被對手追平，史巴列堤賽後不滿表示：「我哋有好嘅傳送，但傳送要有效果，否則係毫無意義。阿爾巴尼亞下半場谷上前，我哋本來應該有更多空位去攻擊，但球員反而踢得更保守。」