非典型勝利！西班牙輸控球率　16年第1次

西班牙嘅傳控足球多年來引領戰術潮流，由沙維、恩尼斯達到近年嘅洛迪卡斯簡迪、柏迪，西班牙比賽「贏形勢」係必然定律，不過今屆歐國盃首仗對克羅地亞，西班牙竟然只有47%控球率，係16年來首次喺比賽入面「輸控球」，但結果仍然大勝3比0。

西班牙自2008年歐國盃決賽對德國，以46%控球率贏波捧盃後，16年來經歷136場正式比賽，控球率全部高過對手，但今場對克羅地亞就減少控球，利用前場嘅速度去進行突擊，最終只得47%控球率，但就拎到一場「非典型勝利」。

西班牙領隊富安迪賽後解釋：「或者喺其他時候，高控球率可以保證到更好成績，但依家呢隊西班牙可以出其不意，就好似今場咁樣，我好滿意。我哋用波好有智慧、前場球員好決斷，又有速度高嘅前鋒，證明唔需要高控球都可以傷害對手。」