匈牙利「肥壯巨人」上陣　網民震驚：佢真係球員？

周六(15日)晚歐國盃A姐，匈牙利落後之下，派出「秘密武器」馬田阿當上陣搏殺，令全世界球迷為之震驚，因為呢位前鋒唔止高大，而且體形「肥壯」，甚至令人質疑佢到底係唔係足球員。

馬田阿當79分鐘後備上陣，雖然未能為匈牙利收復失地，甚至再失1球，以1比3不敵瑞士，但佢仍然成為網上熱話，因為呢位身高1米91嘅29歲射手體形龐大，似巨形版「肥哨」朗拿度，估計體重超過200磅。

由於馬田阿當外形唔似足球員，賽後立即被網民瘋狂起底，原來佢效力蔚山HD，為呢支韓職球隊披甲3季總共上陣54場入17球及8次助攻。

馬田阿當2022年首次晉身匈牙利國家隊，至今23次上陣入3球及3次助攻，包括今屆歐國盃外圍賽入2球，實力不俗，可能因為體形比一般球員肥，導致能力受到外界質疑。

至於馬田阿當今場踢咗11分鐘表現一般，9次觸球有4次失球控球權，5次傳波有3次成功交畀隊友，並未發揮「秘密武器」作用。