意大利鋒線的悲哀　巴列拿竟成首席射手

意大利衞冕歐國盃第一擊，對住被認為係今屆最弱球隊阿爾巴尼亞，竟然開賽23秒就失波，成為歐國盃史上最快失球紀錄，即使意軍最後反勝2比1，但仍難掩尷尬。此外，意大利靠剛傷愈復出嘅尼高路巴列拿射入致勝1球，呢位國際米蘭中場成為意大利今屆大軍名單之中，累積最多入波球員，反映鋒線人才凋零。

意大利今仗有66%控球率，16次射門，比對手多1倍，但鋒線球員腳頭無靈，2個入波分別來自中堅巴斯東尼、中場尼高路巴列拿。巴列拿入波後，國家隊入球數字增至10球，成為陣中唯一累積入波達雙位數球員。反觀正選前鋒施卡馬卡17次為國家隊上陣僅入1球，翼鋒費達歷高基艾沙48次上陣亦只有7球進帳。

反而後備上陣嘅前鋒列迪古，9次披甲入4球，率效屬於鋒線球員之中最高，依家就睇領隊史巴列堤願唔願意畀更多機會呢位阿根廷「歸化兵」表演。