收購班夫韋迪受挫　曼聯轉斟迪歷特

早前傳出曼聯計劃收購愛華頓中堅班夫韋迪，但由於「拖肥糖」企硬要求7,000萬鎊(約6.9億港元)以上轉會費，紅魔鬼只願意畀4,300萬鎊(約4.25億港元)，令交易難以完成。根據英國《鏡報》爆料，曼聯轉移目標，斟介拜仁慕尼黑中堅馬菲斯迪歷特。

曼聯領隊坦哈格執教阿積士期間，曾經同馬菲斯迪歷特合作，今年1月已經傳出坦哈格有意簽入呢位24歲荷蘭國腳。最新消息指，拜仁慕尼黑新帥高柏尼計劃重組防線，唔排除出售馬菲斯迪歷特，估計4,200萬鎊就有交易，符合曼聯預算。

馬菲斯迪歷特表示，歐國盃舉行期間，要專注為荷蘭爭標，唔會考慮轉會問題，預料曼聯要等賽事結束之後，先至可以同迪歷特傾加盟事宜。

除咗馬菲斯迪歷特之外，水晶宮中堅馬克古希都係曼聯收購目標，佢有份為英格蘭出戰今屆歐國盃。