35歲阿拿奧杜域未言退　把握歐國盃拯救事業

奧地利前鋒阿拿奧杜域剛過去一季效力國際米蘭期間經常受傷，令人懷疑呢位35歲老將嘅球員生涯是否接近結束，但阿拿奧杜域唔認老，豪言可以喺今屆歐國盃做齣好戲，令事業翻生。

阿拿奧杜域上年夏天被博洛尼亞外借去國際米蘭，為期2季，但大部份時間擔任後備，加上不時受傷，因而傳出國米打算提早「退貨」。呢位綽號「奧地利伊巴謙莫域」高大射手話：「我嘅肌肉一直有問題，導致精神上亦面臨壓力，但情況已好轉，有能力擔任正選，我喺國際米蘭仲有好多事未做，下季要完成佢，現時集中力量踢歐國盃，我哋大部分球員效力德甲球隊，習慣喺德國比賽，可以創造驚喜，甚至擊敗法國。」阿拿奧杜域雖然係「玻璃腳」，但每次比賽都交足課，上季為國米射入7球及3次助攻，有信心可以留隊。

阿拿奧杜域屬於奧地利國家隊史上最多次上陣球員，達到112次，並射入36球，僅次於入44球嘅名宿保士達，佢另一個目標應該係超越保士達，成為奧地利史上首席射手。