法國中場多傷兵　迪甘斯靠「新韋拉」救亡

歐國盃爭標熱門之一嘅法國未開波，已經受傷兵問題困擾，兩位中場曹亞文尼、拉比奧特都有傷在身，預料無法出戰D組首場分組賽對奧地利，領隊迪甘斯可能要用國際賽經驗尚淺嘅尤索夫科芬拿擔任正選。

曹亞文尼自5月初歐聯4強為皇馬披甲對拜仁慕尼黑之後，一直養傷，根據法國《巴黎人報》爆料，呢位24歲中場硬漢仍未痊愈，基本上無緣首輪歐國盃分組賽。至於效力祖雲達斯嘅拉比奧特受到肌肉傷患困擾，同樣難以參加比賽。

至於33歲老將尼高路簡迪去沙特阿拉伯搵食之後，能否應付歐國盃高水平賽事，亦存在疑問，據悉主帥迪甘斯比較傾向搵尤索夫科芬拿同卡馬雲加組成雙防中。

現年25歲嘅尤索夫科芬拿效力摩納哥，2022年9月首次晉身大國腳，亦有份參加上屆世界盃，但主要擔任後備。尤索夫科芬拿工作效率高，即使僅為法國上陣18次已入3球，反觀同樣係防中嘅尼高路簡迪踢55場國際賽只係入2球，可見尤索夫科芬拿攻守兼備，因而被譽為「新韋拉」，現時正好把握法國人腳不整，爭取上位。