德國靠歐國盃提振經濟　有望增318億零售消費

德國舉行今屆歐國盃，除咗希望把握主場之利奪取冠軍之外，亦有助提振經濟。根據德國零售商協會預料，歐國盃可以為德國帶來額外38億歐元(約318億港元)零售消費額。

德國上年國內生產總值萎縮0.3%，屬於全球主要經濟體之中最差，政府對於舉行歐國盃，促進消費及提振經濟，寄予厚望。德國零售商協會上月進行民意調查，結果顯示大部分人願意喺賽事舉行期間，額外花費101歐元至200歐元，當中最傾向購買食品及飲料，其次係體育用品、電子產品等。

此外，今屆歐國盃分別喺10個城市舉行，合共270萬張門票，可以吸引大量遊客前往德國旅行同睇波，當局預期今年旅遊業收入會刷新紀錄，可以為德國經濟帶來重要貢獻。