奧斯賓拿離開艾納斯　新門將呼之欲出

沙特阿拉伯豪門艾納斯宣布，門將奧斯賓拿離隊，感謝佢效力2季以來嘅貢獻，呢位35歲哥倫比亞國腳將以自由身，重投母會國民體育會。

奧斯賓拿曾經效力阿仙奴、拿玻里等球隊，2022年夏天加盟艾納斯，兩季合共上陣29場，包括今季上陣15場，有5次「零封」對手。

據悉奧斯賓拿離隊之後，艾納斯將會簽入祖雲達斯門將施捷斯尼，意味佢將會同C朗再次做隊友。盛傳艾納斯向呢位34歲波蘭國腳開出2年合約，年薪為1,900萬歐元(約1.6億港元)，預料等施捷斯尼為波蘭踢完歐國盃之後，就會進行最後轉會手續。