曼聯棄將絕殺　荷蘭驚險反勝波蘭

周日(16日)歐國盃早場，D組荷蘭對波蘭。賽前被睇淡嘅波蘭今場先開紀錄，荷蘭由利物浦鋒將加普扳平，曼聯棄將韋格賀斯做後備殺手，比賽末段為荷蘭攻入致勝球，以2比1反勝，驚險地全取3分。

荷蘭今場擺大個頭，迪比、加普、沙維西蒙斯三箭頭攻堅，中堅華斯爾雲迪積克在歐國盃決賽周首次登場；波蘭隊長羅拔利雲度夫斯基因傷缺陣，由阿當布沙拍烏班斯基踢雙箭頭。

荷蘭初段踢出氣勢，撳住波蘭嚟攻，雷恩達斯同沙維西蒙斯都有起腳機會，可惜唔中目標，受壓嘅波蘭沉着應戰，並於16分鐘憑角球機會先開紀錄，阿當布沙近柱頭槌頂成1比0。

先失波嘅荷蘭加強施壓，29分鐘，曼城利物浦連線，尼敦阿基傳交加普施射，省中對方球員改變方向收死門將施捷斯尼，為荷蘭追成1比1完半場。

下半場荷蘭進攻速度放緩，一度被波蘭壓住嚟打，末段朗奴高文作出調動，由韋格賀斯入替迪比，這位曼聯棄將改變戰局，83分鐘把握門前機會勁射破網，荷蘭反超前2比1。