英格蘭不失球創紀錄　「阿諾特實驗」未完成

英格蘭喺C組1比0擊敗塞爾維亞，進攻表現未如人意，但後防就維持一貫嘅穩健，令英格蘭成為歐國盃史上首支連續5場分組賽不失球球隊，佢哋對上一次歐國盃分組賽失球，已經係8年前對威爾斯被加里夫巴利所攻入。

英格蘭今場力保不失，防中迪格蘭賴斯居功至偉，佢全場10次成功搶到球權，係今屆歐國盃最高紀錄，不過佢嘅中場拍檔就仍有疑問，今場用阿歷山大阿諾特客串，表現好壞參半，上半場曾嚴重犯錯幾乎輸波。英格蘭名將里奧費迪南表示：「當佢用波進攻，幾次畀對手捉到，但你見到佢啲傳送同轉向，又真係唔係好多人做到。」

不過領隊修夫基就大讚阿諾特，相信會堅持呢個「實驗」：「阿諾特踢得好優雅，位置感好好，尤其比寧咸會經常壓上前，阿諾特可以平衡番個中場，換走佢只係因為當時球隊需要更有活力嘅球員。」