1100日後再戰歐國盃　艾歷臣：不一樣的故事

「童話球隊」丹麥喺歐國盃首仗，只能1比1打和斯洛文尼亞，不過中場基斯甸艾歷臣就光芒四射，佢相隔1,100日後再戰歐國盃，3年前佢因心臟病暈倒球場，裝住心臟除顫器嘅佢今仗再度上陣，入波兼當選最佳球員，佢賽後形容今屆歐國盃係「不一樣的故事」。

32歲嘅艾歷臣今場表現非常活躍，全場參與丹麥12次攻門，除咗自己有5次埋門，仲創造7次機會畀隊友射門。今屆係艾歷臣第3次踢歐國盃，2012年丹麥分組賽出局，上屆佢第1場波就心臟病發，今場入波亦係佢喺歐國盃第1個入球。

艾歷臣賽後表示：「今屆歐國盃，我嘅故事好唔同。我充滿信心，能夠繼續比賽已經好好，參加歐國盃就更加特別。我有諗過自己從未喺歐國盃入波嘅問題，能夠入波幫丹麥贏波令人開心。」