海倫門前失機　陷國際賽入球荒

丹麥喺歐國盃1比1打和斯洛文尼亞，效力曼聯嘅前鋒海倫表現差勁，佢下半場曾經喺龍門口錯失必入球，成為丹麥失分關鍵。海倫已經連續5場國際賽「食白果」，狀態令人擔心。

海倫喺卡塔爾世盃後正式成為丹麥主力，頭4場歐國外就入咗6球，之後更高價由阿特蘭大轉投曼聯。不過隨住佢喺英超跌Watt，連帶國家隊亦出現入球荒，近9場為丹麥披甲，只係對聖馬力諾入過1球，而近5場比賽全交白卷。

丹麥領隊賀文特喺對斯洛文尼亞前表示，海倫經過一輪入球衝刺後，出現回落係正常現象，最重要係喺入球以外嘅工作仍有好表現。不過今場歐國盃，海倫喺入球以外同樣「一無是處」，除錯失1次黃金機會外，8次地面爭搶7次爭輸、4次嘗試扭波過人全部失敗，仲有9次失去控球權，演出令人失望。