利華古遜3子撐起捷克　舒希克：入5球收貨

捷克上屆歐國盃殺入8強，王牌前鋒柏德列舒希克以5個入波，同C朗拿度並列射手榜第1位，最後因助攻唔及C朗而得「銀靴獎」。28歲嘅舒希克今屆再戰歐國盃，豪言要挑戰上屆入球紀錄。

舒希克喺上屆歐國盃5場入5球，包括對蘇格蘭嘅50碼驚天笠射，呢位前鋒表示：「德國係我捷克以外第2個家，我同呢度球迷相處好長時間。我會嘗試打破上屆入5球嘅數字，但如果只係追平，我都會開心收貨。」

利華古遜上季橫掃德國，全季53場只輸1場，而捷克3子柏德列舒希克、阿當荷路錫同馬迪積高華都有份入選歐國盃大軍，舒希克話：「上季我哋全季只係輸過1場，希望喺捷克可以延續呢個紀錄。」