土耳其德國一家親　成歐國盃第2主隊

德國移民政策寬鬆，其中土耳其移民就多達數百萬，足球世界亦早已「一家親」，德國今屆歐國盃隊長根度簡就係土耳其移民後裔，土耳其今屆亦有5個喺德國出生嘅球員，有德國嘅土耳其問題研究專家表示，土耳其會係今屆第2主隊。

土耳其問題研究中心發言人艾華表示：「我唔覺得球迷要揀德國『或者』土耳其，而係支持德國『同埋』土耳其，大部份球迷都想兩隊有好成績，如果可以喺4強或決賽碰頭，肯定會令全國開心。」德國上年11月喺柏林同土耳其踢熱身賽，結果土耳其球迷人數同聲勢完全蓋過主隊，土耳其仲贏埋3比2。

土耳其今屆有5個德國出世球員，包括隊長查漢奴古、副隊長卡恩阿耶漢同超新星基倫耶迪斯等等，因膝傷落選歐國盃大軍嘅奧辛卡巴克早前就話：「好多土耳其人住喺德國，我肯定到時會有好多土耳其球迷入場，就好似係主辦國一樣。」