「歐國盃專家」達洛治　鬥捷克係最好回憶

葡萄牙8年前贏歐國盃冠軍，達洛治仲未係大國腳，不過當年照樣稱霸歐洲，協助葡萄牙贏U17歐國盃冠軍。達洛治之後喺各級歐國盃都有「決賽命」，2017年拎U19歐國盃亞軍、2021年又拎U21歐國盃亞軍，今屆當然想再次殺入決賽。

上季被球迷選為曼聯最佳球員嘅達洛治表示：「喺阿塞拜疆贏U17歐國盃非常特別，為國家隊奪冠感覺係與別不同，如果幫A隊稱霸就更正，我哋會盡全力去實現呢個夢想。」葡萄牙U17當年決賽1比1和西班牙再射贏12碼，入球者就係達洛治。

達洛治升上大國腳後，上陣20場入2球，2個入波就係2年前歐國聯對捷克攻入，今屆歐國盃首仗又對捷克，達洛治話：「為國家隊入波係永世難忘，對捷克一仗係我最美好嘅回憶，亦令我更加有動力去踢好波，如果領隊信任我，我會盡力再爭取入波。」