球迷佗衰家犯4宗罪　累阿爾巴尼亞足總受罰

阿爾巴尼亞今屆唔單止創造咗歐國盃史上最快入波，亦係成為首支被歐洲足協「開刀」球隊，佢哋嘅球迷因為喺日前對意大利之役搞事犯下「4宗罪」，累到阿國足總將會受到處分。

歐洲足協指出，阿爾巴尼亞將面臨至少4項指控，因為佢哋球迷喺日前B組首輪反輸畀意大利1比2之役，展示出具挑釁標語、掟嘢入球場、施放煙火，以及有球迷衝入比賽場地，令比賽末段一度暫停，至於球迷展示咗乜嘢挑釁標語，歐洲足協未有明言，只係話「傳遞不適合運動會嘅挑釁訊息」，輸波又輸品，阿爾巴尼亞足總今次真係多得班粉絲唔少喇。