比利時狂轟47腳0入球　隨時重演世界盃出局噩夢

比利時今屆歐國盃首場分組賽0比1不敵斯洛伐克，根據統計，球隊喺國際大賽近47次射門都入唔到波，包括上屆世界盃在內，已經連續3場大賽食白果，隨時重演兩年前世界盃分組賽出局噩夢。

比利時今仗即使擁有4位進攻猛將盧卡古、奇雲迪布尼、李安度杜沙特、謝利美杜古擔正，但16次射門只有5次中目標，盧卡古2次射門入網，經VAR檢視後被判無效，認真黑仔。

睇番比利時對上一次大賽入波，已經係2022年世界盃首場分組賽對加拿大，憑巴舒亞伊建功，以1比0小勝加拿大，之後2場分組賽合共有26次射門，但卻分別0比2不敵摩洛哥，打和克羅地亞0比0，加上今場歐國盃，0比1輸畀洛伐克，比利時錄得連續3場大賽冇波入嘅尷尬局面。

比利時上屆世界盃分組賽出局，已被指由「黃金一代」進入「黃昏一代」，相隔2年後球隊仍然未有起色，呢支「歐洲紅魔」前景唔樂觀。