33歲簡迪仍然「覆蓋地表」　當選最佳球員

法國喺歐國盃以1比0擊敗奧地利，33歲中場尼高路簡迪瞻前顧後，表現大勇，當選今場最佳球員，證明佢即使去咗沙特阿拉伯搵食，仍然保持頂級水準，獲得輿論好評，認為簡迪活動範圍繼續「覆蓋地表」。

尼高路簡迪今場有65次觸球，傳球成功率達86.5%，包括2次關鍵傳球，另有3次成功攔截、5次地面爭波勝出、6次奪回控球權，為法國防線提供第一道堅固屏障，獲得今場最佳球員絕對實至名歸。

尼高路簡迪近年受傷患問題困擾，上年夏天黯然離開車路士，加盟沙特阿拉伯球隊伊蒂哈德，被指去「養老」等退休，法國主帥迪甘斯今次徵召簡迪，亦受到質疑。不過，事實證明迪甘斯決定非常正確，特別係另1位防中曹亞文尼養傷之下，尼高路簡迪可以撐起中場線。

由於尼高路簡迪不惜氣力，助攻助守踢法，因此網上早年流傳一句金句：「地球表面上有70%係水，其餘地方由簡迪覆蓋。」時至今日，呢句說話仍然啱用。