匈牙利射手用5個字回應「肥壯」之謎

匈牙利上場歐國盃對瑞士落後之下，派出前鋒馬田阿當上陣搏殺，由於呢位「秘密武器」身形偏肥，唔似足球員，令球迷嘖嘖稱奇，亦令馬田阿當成為網上熱話，人氣急升，佢接受傳媒訪問，對於「肥壯」之迷作出回應話：「我天生係咁」。

效力韓職球隊蔚山HD嘅馬田阿當身高1米91，體重87公斤(約192磅)，加上面形圓潤，睇落偏肥，唔少網民質疑佢平時點操練，冇理由練到成個鉛球運動員咁嘅身材。馬田阿當好委屈話：「我天生係咁，一直都改變唔到，可能係遺傳基因問題，冇得改變，平時都有好多人討論我嘅身材，我只可以咁解釋。」

事實上，馬田阿當「肥壯」身形並冇影響佢場上表現，佢為蔚山HD上陣54場入17球及8次助攻，為匈牙利23次披甲入3球及3次助攻，包括今屆歐國盃外圍賽入2球，匈牙利周四(20日)凌晨對德國，馬田阿當有望再次上陣搏殺，相信又會成為焦點人物。