【官宣】拉莫斯離開西維爾　或轉戰美職鬥美斯

西甲球隊西維爾正式宣布，著名中堅沙治奧拉莫斯拒絕續約，意味今夏約滿之後，就會自由身離隊，盛傳呢位38歲西班牙老將有可能加盟下季美職新球隊FC聖迭戈，有望同國際邁亞密老對手美斯交鋒

西維爾發表聲明指沙治奧拉莫斯通知會方，佢已經實現重返母會西維爾嘅夢想，現時係時候離開。沙治奧拉莫斯出身於西維爾青年軍，2005年轉投皇馬，效力「銀河艦隊」16年，贏盡西甲、西班牙盃、歐聯及世冠盃等多項錦標，亦協助西班牙奪得2010年世界盃，2008及12年歐國盃冠軍。

其後沙治奧拉莫斯加盟巴黎聖日耳門亦奪得2次法甲冠軍，佢上年夏天重返母會西維爾，各項賽事上陣37場，並有7球進帳，可見寶刀未老。美職下季將會擴軍，加入新球隊FC聖迭戈，據悉呢支新軍計劃邀請沙治奧拉莫斯加盟，增強實力及號召力，如果成事，拉莫斯可以重遇美斯、布斯基斯、蘇亞雷斯等前巴塞隆拿對手。