坦哈格留任　曼聯可能留埋岩拉伯特

曼聯領隊坦哈格由原本被炒但突然獲留任，據報摩洛哥國腳蘇夫恩岩拉伯特都有類似情況，呢位由費倫天拿外借嘅防中原本被退租，但依家可能有變，獲得留用。

岩拉伯特加盟曼聯初期表現一般，期間試過客串左閘，不斷有消息稱今季結束後退還畀費倫，但岩拉伯特季尾踢出好表現，包括英足盃決賽對曼城踢足全場，協助紅魔捧盃，會方重新評估其去留，借日期滿先作出決定。

英國傳媒報道，曼聯不排除買斷岩拉伯特，費用為2,000萬歐元(約1.7億港元)，當中考慮到一旦出售卡斯米路，需要物色新防中，岩拉伯特就係最佳替代人選。

該27歲中場已表態，希望繼續留喺曼聯，但如果曼聯唔買斷，岩拉伯特都會尋求轉會其他英超球隊，據報富咸係潛在買家之一。