C朗5次攻門3中龍　繼續刷新紀錄

C朗拿度再次為葡萄牙喺歐國盃登場，繼續刷新紀錄之餘，39歲嘅佢亦用表現證明自己仲踢得，全場5場攻門有3次命中目標，賽後連捷克領隊夏錫都大讚C朗威脅力非常巨大。

C朗自2004年歐國盃開始，今屆係紀錄性第6次參賽，連同5次出戰世界盃，佢11次踢國際大賽亦係球壇No.1，最接近嘅馬圖斯(德國)、莫迪歷(克羅地亞)同比比(葡萄牙)都係得9次。

葡萄牙戰術安排C朗做箭頭「等波踢」，佢亦做足本份，每次拎波都可以製造攻門，而且有2次傳球製造射門，喺歐國盃史上累積43次關鍵傳送，打破前輩費高保持嘅歐國盃紀錄(42次)。

捷克領隊夏錫賽後表示：「以C朗嘅年紀，每次落場都有咁大威脅真係難以置信，佢今場再展示自己嘅天才，佢好識得製造機會，我要向呢位足球史上其中一位最佳球員致敬。」