艾達古拿破C朗紀錄：唔在乎個人成就！

土耳其喺歐國盃3比1擊敗格魯吉亞，效力皇家馬德里嘅超新星艾達古拿光芒四射，佢嘅世界波入球，令佢以19歲114日之齡，成為歐國盃史上首演入波最年輕球員，舊紀錄保持者就係C朗拿度，佢喺04年歐國盃首演入波，當時年齡為19歲128日。

賽前收到皇馬教練安察洛堤嘅祝福訊息，艾達古拿亦相當爭氣，為土耳其射入領先2比1嘅世界波，時速高達118公里。對於創造歐國盃歷史，艾達古拿賽後就老練回應：「今場好難踢，球迷作出巨大支持，我要恭喜球隊旗開得勝。我從來都唔在乎個人成就，只係為咗球隊而戰，好開心可以成為今場勝仗嘅一份子。」

艾達古拿上季尾喺西甲嶄露頭角，皇馬教練安察洛堤已經表明唔會將佢外借，會作出重點栽培，預言佢將來會成為皇馬嘅領袖。