難過踢歐國盃　耶馬讀書最怕兩科

西班牙16歲新星拉明耶馬喺今屆歐國盃首戰對克羅地亞，表現出色並貢獻1次助攻，踢大賽完全難唔到呢位天少球員。不過，耶馬都有「死穴」，佢自爆讀書最怕數學同歷史，擔心考試會「肥佬」。

拉明耶馬以16歲零339日成為歐國盃史上最年輕上陣球員，甚至要帶功課去訓練基地做，呢位翼鋒接受西班牙傳媒訪問，講到學業問題：「我諗學校會透過互聯網發放考試成績表畀我，如果球隊打入決賽，我今個學年就唔使再返學校上堂，希望老師畀我合格啦，我覺得數學同歷史最難讀，要用好多時間去溫習。」

唔少網民認為，以拉明耶馬嘅足球成就，根本應該直接「拔尖」讀大學，一定有唔少大學爭住招攬佢入讀。