曼聯情擺埋一邊　明奈要終結艾歷臣童話

英格蘭喺歐國盃C組對丹麥，中場新星明奈有機會同2位曼聯隊友基斯甸艾歷臣、海倫交鋒，明奈賽前表示喺艾歷臣身上獲益良多，但喺歐國盃美夢面前就「冇面畀」，落場嘅話會全力終止艾歷臣嘅歐國盃童話。

艾歷臣上屆歐國盃首仗就心臟病發險死球場，今屆首仗就取得個人首個歐國盃入波，明奈表示：「艾歷臣同海倫都係好隊友，我喺艾歷臣身上學到好多嘢，上季睇佢踢波我會盡量學習，佢喺歐國盃嘅旅程真係好神奇，但如果我今仗有份落場，我會將友情擺埋一邊，全力打敗佢哋！」

明奈喺首仗對塞爾維亞喺85分鐘後備上陣，雖然要搶走迪格蘭賴斯個正選冇乜可能，但佢就想同迪格蘭賴斯合作：「我已經準備好上陣，迪格蘭賴斯好強，主宰晒成個中場，同佢拍檔我可以放心上前助攻，因為我知佢一個會搞掂晒。」