西班牙皇蘇勢力崛起　兩位中場成搶手貨

西班牙出戰今屆歐國盃大軍名單，有5位球員效力皇家蘇斯達，成為「鬥牛兵團」最大勢力，兩位中場米基爾馬連奴、蘇比文迪屬於轉會市場搶手貨，預料賽事結束之後，好大機會轉投豪門大球會。

根據西班牙《馬卡報》爆料，巴塞隆拿、馬德里體育會不約而同睇中米基爾馬連奴，呢位27歲球星只剩下1年合約，並且無意續約，令皇蘇管理層非常焦慮，就算佢嘅毀約金達6,000萬歐元(約5億港元)，仍然打算今夏割價以2,500萬歐元(約2.1億港元)出售米基爾馬連奴，以免佢明夏約滿自由身離隊，導致人財兩失。

至於25歲嘅蘇比文迪獲得阿仙奴垂青，佢嘅毀約金同樣為6,000萬歐元，對於兵工廠而言，並非大數目。蘇比文迪近日暗示唔排除轉會：「我現時要集中精神踢歐國盃，只要球隊獲得佳績，個人成就亦會隨之而來。」米基爾馬連奴、蘇比文迪上場歐國盃對克羅地亞，都係後備上陣，未來2場分組賽對意大利、阿爾巴尼亞，可能有機會擔正。