麥巴比問面罩介紹　欖球名將私訊畀料

法國球星基利安麥巴比上仗歐國盃對奧地利，爭頂時撞傷鼻樑，搞到「爆缸」，雖然唔使做手術，但佢都預咗要戴住面罩落場，仲係網上問意見，法國欖球名將就即有回覆，仲話有好介紹！

麥巴比整傷之後，好多網民都紛紛為佢要戴面罩畀意見，大家都笑指忍者龜面罩就最適合，當然呢個純屬講笑，不過，法國欖球名將杜邦(Antoine Dupont)就有回應，並叫麥巴比私訊佢。

「請私訊我攞促銷代碼，我有啲解決方案。最重要係祝你好運。」Dupont舊年為法國隊出戰世界盃初期，遇上比麥巴比更嚴重嘅骨折，佢有接受手術，其後兩周內就恢復訓練，並且喺世界盃8強復出；佢當時特制咗一個面具，但最終第二場比賽只戴一頂護帽出戰。

法國隊嚟緊第二場會面對荷蘭，據傳媒話麥巴比應該禮拜三可以跟操，睇下麥巴比到時有咩新造型！