泰迪治自稱「全隊最好波」　尷尬道歉

塞爾維亞喺歐國盃首戰輸畀英格蘭後，隊長杜辛泰迪治喺賽後自稱「全隊最好波」，批評領隊史杜高域放佢做後備嘅決定，不過球隊日前召開全體會議，杜辛泰迪治就向全隊道歉，相當尷尬。

杜辛泰迪治對英格蘭要61分鐘先至入場，佢賽後埋怨話：「我係塞爾維亞嘅隊長同領袖，亦係全隊最好波球員，我應該要正選上陣。」呢番言論引起球迷熱議，亦明顯係對領隊史杜高域嘅開火。

塞爾維亞足總日前發聲明表示：「塞爾維亞全體職球員，喺德國酒店內開咗個會議，討論球隊嘅責任同其他問題，杜辛泰迪治亦借呢個機會，向史杜高域同隊友就佢嘅魯莽言論道歉。」據報杜辛泰迪治係喺隊友勸告下，以大局為重而決定「跪低」。