英格蘭有「秘製神汁」　球員唔怕抽筋

歐國盃賽程緊密，場上競爭激烈，球員往往踢到抽筋，英格蘭有備而來，準備大量醃黃瓜汁，可以迅速舒緩抽筋，「三獅兵團」球員就算不惜氣力逼搶，都唔怕抽筋。

英格蘭上場對塞爾維亞，踢到比賽末段，後衞捷比亞出現抽筋情況，需要走到場邊治理，軍醫向佢遞出兩包飲料，引起英國傳媒注意。事後傳媒經過了解，發現一包係高碳水化合物飲料，用來補充體力，另一包係醃黃瓜汁，用來舒緩抽筋。

據悉球員飲醃黃瓜汁舒緩抽筋，比飲水快40%，因為呢種「秘製神汁」含有納、鉀、醋，可以補充因為運動而流失嘅大量鹽份。事實上，醃黃瓜汁早於幾年前已被廣泛用於舒緩球員抽筋問題，其中2018/19年球季英超，阿仙奴對車路士，當時兵工廠中場盧卡斯托拉拿飲完一啖之後，立即吐番出來，據了解佢嫌醃黃瓜汁太難飲。