「新尼斯達」極速上位　倫敦雙雄搶人

意大利新晉中堅卡拉科利迅速上位，上場歐國盃對阿爾巴尼亞，以正選上陣，呢位22歲博洛尼亞守將用球能力強，屬於「組織型」後衞，踢法瀟灑，被譽為「新尼斯達」，英超倫敦雙雄車路士、熱刺都計劃今夏收購佢。

卡拉科利出身於羅馬青年軍，其後轉投瑞士球隊巴素利，上年夏天加盟博洛尼亞，剛過去球季意甲上陣30場，並有2球進帳，2個入波都係季尾對祖雲達斯一役攻入，令佢一戰成名，上月底首次晉級意大利國家隊，並獲正選，上位速度極快。

卡拉科利上場對阿爾巴尼亞，以22歲零27日成為意大利史上喺歐國盃上陣第2年輕球員，僅次於馬甸尼，獲得名宿森保達激讚，認為佢係一位充滿個性同勇氣嘅球員。各大球會亦開始關注卡拉科利，據悉車路士派人入場睇卡拉科利上場歐國盃表現，熱刺亦準備出手搶人，開始接觸博洛尼亞。

由於博洛尼亞教練莫達已轉投祖雲達斯，希望帶埋卡拉科利過檔，預料佢身價勢必水漲船高，估計要5,000萬歐元(約4.2億港元)先至可以買到佢。